Ovttaveardásašvuođa- ja dásseárvolávdegoddi 1.1.2015 rájes

Ovttaveardásašvuođa- ja dásseárvolávdegoddi

Ovttaveardásašvuođa- ja dásseárvolávdegoddi lea stáhtaráđi nammadan iehčanas ja sorjjaskeahtes riektedorvoorgána. Dat bearráigeahččá ovttaveardásašvuođalága ja dásseárvolága čuovvuma priváhta doaimmas sihke almmolaš hálddahus- ja fidnodoaimmas.

Ovttaveardásašvuođa- ja dásseárvolávdegotti doaibmaváldái ii gula priváhta- ja bearašeallima birii gullevaš áššit, iige oskku hárjeheapmi.

Lávdegotti doaibman lea addit riektesuoji daidda, geat leat vásihan šaddan olgguštuvvot dahje gártan olggušteapmái gullevaš gildojuvvon vuostedoaimmaid vuollásažžan

Riikkabeivviid guoskevaš ášši sáhttá dolvojuvvot ovttaveardásašvuođa- ja dásseárvolávdegotti gieđahallamii dušše, go jearaldat lea riikkabeivviid dahje dan doaibmaorgána doaimmas virgeoapmahažžan dahje bargoaddin.

Lávdegotti bearráigeahču olggobeallái báhcet dásseválddi presideantta, stáhtaráđi almmolaščoahkkima, duopmostuoluid ja eará lágastanorgánaid, stáhtaráđi vuoigatvuođakánslera ja riikkabeivviid vuoigatvuođaáššealbmá doaibma.

Olggušteami gildosa guoskevaš ášši galgá guođđit dutkkakeahttá, jus ášši lea jođus dahje boahtá johtui eará virgeoapmahačča gieđahallamii.

Ovttaveardásašvuođa- ja dásseárvolávdegoddi sáhttá gieldit joatkimis dahje ođasmahttimis olggušteami dahje vuostedoaimmaid ja ásahit mearrádusa čuovvuma beavttálmahttimin áittasáhku ja dubmet dan máksin láhkai.

Lávdegoddi sáhttá mearridit áššeoapmahačča álggahit govttolaš mearreáiggi siste doaimmaid ovttaveardásašvuođalága ásahan geatnegasvuođaid deavdimii.

Lávdegoddi ii sáhte mearridit buhttema dahje eará buhtadusa máksin láhkai.

Lávdegotti mearrádusain sáhttá ohcat nuppástusa hálddahusrievttis.

Ohcamuša gieđahallan lávdegottis lea nuvttá, ja dan doaimmahusgirjjit leat nuvttá. Eará gearretgoluin áššeoapmahaččat vástidit ieža.

Bearráigeahčču

1. Ovttaveardásašvuođaláhka

Ášši sáhttá ovttaveardásašvuođa- ja dásseárvolávdegotti gieđahallamii doalvut dat, geasa olggušteaddji meannudeapmi čuohcá, dahje áššeoapmahačča miehtamiin ovttaveardásašvuođaáittardeaddji dahje searvvuš, mii ovddida ovttaveardásašvuođa.

Lávdegoddi sáhttá nannet oassebeliid gaskasaš soahpama.

2. Dásseárvoláhka (Láhka nissoniid ja albmáid gaskasaš dásseárvvus)

Ášši sáhttá ovttaveardásašvuođa- ja dásseárvolávdegotti gieđahallamii doalvut dásseárvolága guoskevaš osiin dásseárvoáittardeaddji dahje bargomárkaniid guovddášsearvi.

Dásseárvolága čuovvuma bearráigeahčus lávdegottis lea doaibmaváldi maiddái bargoeallimii guoskevaš áššiin.

Dásseárvoáittardeaddji dahje bargomárkaniid guovddášsearvi sáhttá doalvut dásseárvolága 7, 8, 8 a - 8 e dahje 14 § olgguštannjuolggadusaid vuostemeannudeami guoskevaš ášši ovttaveardásašvuođa- ja dásseárvolávdegotti gieđahallamii.

Dásseárvoáittardeaddji sáhttá doalvut dásseárvolága 5 a ja 6 a § guoskevaš ášši, mii lea meannudeami vuostá, lávdegotti gieđahallamii dásseárvolága 21 §.a 4 momeanttas oaivvilduvvon meannudeami várás.

Cealkámuša addin

1. Ovttaveardásašvuođalága dulkon

Lávdegoddi sáhttá addit cealkámuša ovttaveardásašvuođalága dulkoma dáfus mearkkašahtti áššis duopmostuolu, ovttaveardásašvuođaáittardeaddji, dahje eará virgeoapmahačča dahje servoša, mii ovddida ovttaveardásašvuođa, bivdaga vuođul.

Bargosuodjalanvirgeoapmahaš sáhttá bivdit ovttaveardásašvuođa- ja dásseárvolávdegottis cealkámuša ovttaveardásašvuođalága dulkomis ja heiveheamis.

Lávdegoddi ii sáhte addit ovttaveardásašvuođalága dulkomii guoskevaš cealkámuša, jus ášši gullá bargosuodjalanvirgeoapmahačča doaibmaváldái, dahje guoská bargo- ja virgeeaktosoahpamuša dulkoma.

2. Dásseárvolága dulkon

Duopmostuollu sáhttá bivdit lávdegottis cealkámuša dásseárvolága 7, 8, 8 a - 8 e ja 14 § heiveheamis dásseárvolága mihttomeriid dáfus mearkkašahtti áššis.

Plánengeatnegasvuođa guoskevaš mearrádus

Ovttaveardásašvuođaáittardeaddji sáhttá doalvut virgeoapmahačča dahje skuvlejumi ordnejeaddji ovttaveardásašvuođalága 5 ja 6 §:s ásahuvvon ovttaveardásašvuođa ovddideami guoskevaš plánengeatnegasvuođaášši lávdegotti gieđahallamii.

Dásseárvoáittardeaddji sáhttá doalvut oahppolágádusa dahje bargoaddi dásseárvolága 5 a ja 6 a §:s ásahuvvon dásseárvolága ovddideami guoskevaš plánengeatnegasvuođaášši lávdegotti gieđahallamii.

Ohcamuša dahkan lávdegoddái

Ovttaveardásašvuođa- ja dásseárvolávdegoddái čujuhuvvon girjjálaš ohcamušas galgá almmuhit:

• ohcci namma ja ruovttubáiki

• vejolaš lágalaš ovddasteaddji dahje áššealbmá oktavuođadieđut

• čujuhus, gosa ášši guoskevaš bovdehusaid, ávžžuhusaid ja almmuhusaid sáhttá sáddet

• eará áššeoasálaččaid namat ja oktavuođadieđut

• ohcci gáibádus ovttaskas áššiid mielde

• ohcci gáibádusa doarju vuođustusat ja duohtaáššit

• leago ášši čovdojuvvon dahje jođus duopmostuolus dahje eará virgeoapmahaččas

• čuoččuhuvvon olggušteaddji identitehta ja oktavuođadieđut

Ohcamuša galgá vuolláičállit áššeoasálaš dahje dan gárvvisteaddji.

Áššealbmá geavahettiin ohcci persovnnalaččat vuolláičállán fápmudusa áššealbmái galgá doaimmahuvvot lávdegoddái.

Ohcamuša fápmudusa sáhttá guođđit maiddái elektrovnnalaččat. Elektrovnnalaš ohcamuša ii dárbbaš dievasmahttit vuolláičállagiin, jus áššegirjjis leat dieđut sáddejeaddjis iige áššegirjji originálavuođa dahje čoavddesvuođa dárbbaš eahpidit. Jus lávdegoddái doaimmahuvvon elektrovnnalaš ohcamušas lea čilgehus áššealbmá doaibmaválddis, áššealmmái ii dárbbaš doaimmahit váldegirjji.


Lávdegotti oktavuođadieđut:

YHDENVERTAISUUS- JA TAS-ARVOLAUTAKUNTA

PL 27

FI-00023 VALTIONEUVOSTO

PUH: 029 5150 159

Šleađgapoasta: yvtltk(at)oikeus.fi

Rávven

Ovttaveardásašvuođa- ja dásseárvoáittardeaddji doaimmahat sáhttá rávvet ja veahkehit ohcamuša dahkamis ovttaveardásašvuođa- ja dásseárvolávdegoddái.

Ovttaveardásašvuođaáittardeaddji doaimmahaga rávventelefon lea 0295 666 817 (árgan 10-12).

Šleađgapoasta: yvv(at)oikeus.fi

Dásseárvoáittardeaddji doaimmahaga áššehasbálvalustelefon lea 0295 666 842

(vu-du 9-11 ja 13-15, be 9-11).

Šleađgapoasta: tasa-arvo(at)oikeus.fi

Maiddái vuoigatvuođaveahkkedoaimmahat dahje ášševuoddji sáhttá veahkehit ohcamuša dahkamis.

Vuoigatvuođaveahkkedoaimmahaga oktavuođadieđut

Suoma Ášševuoddjiidlihttu

Jus eahpidat gártan olgguštuvvot bargoeallimis

http://www.tyosuojelu.fi/tyosuhde/yhdenvertaisuus

Julkaistu 25.5.2018